النصائح السبعة القوية في الزواج من بوسنية

Fri, 17 Oct 2014 18:54:03 GMT

تابعوا حساب البوسنه على سناب شات

بعد طلب الكثير من رواد قناتنا على اليوتيوب قررت اني اكتب مقال اتكلم فيه عن الزواج من البوسنة وأقول فيه نصائح للشباب اللي عايزين يتجوزوا بنات من مسلمي البوسنة، وإسمحولي اكتب بلهجتي المصرية علشان أعرف أتكلم بصراحة أكتر

مبدئياً أنا عارف إنت إيه اللي جابك هنا، إما انك بتبحث عن شريكة العمر الجميلة الشقراء أم عيون زرقاء .. أو خضراء ،وطبعاً لازم تكون مسلمة "علشان أهلك يوافقوا"، أو انك زهقت من كتر متطلبات الزواج في عالمنا العربي بتفاصيلها بشبكتها بمهرها بمصاريف أفراح بهدايا خطوبة بأوض نوم وسفرة وليفينج رووم و قايمة... ونيش .... "أنا عارف والله الموضوع مؤلم :) " وعايز تتجوز جوازة سهلة، مش مكلفة قوي ، أو انك عايز تسيب بلدك وتسافر دولة اوروبية تعيش حياه أحسن.

سواء كنت واحد من الأشخاص دول، أو واحد جاي ياخد فكرة "ويشتري بكرة" ، أو واحد مش عايز يتجوز أساساً! إليك بالنصائح التالية اللي لازم تاخد بالك منها قبل ما تنوي الجواز من أي فتاه بوسنية!

١- إختيار الزوجة البوسنية المناسبة
طبعاً غالبية الشباب العربي عمره ما جه البوسنة ولا حتى سمع عنها غير في التسعينات أيام الحرب لما كنا بنشوف حرب البوسنة في الأخبار و احنا صغيرين ، ولو سألك أي حد عن البوسنة حيقولك "مش البوسنة دي تبع الإتحاد السوفيتي باين!"، مبدئياً كدة البوسنة دولة غالبية سكانها مسلمين وتقع في قلب أوروبا، بناتها وشبابها معظمهم شكلهم حلو وجمال بس مش كلهم متدينين ودة طبعاً تأثير الغرب على مجتمعم، يعني لو جيت هنا سراييفو عاصمة البوسنة حتلاقي غالبية البنات مش محجبات، وفي الصيف معظم البنات مبيحبوش موضوع الهدوم دة "الدنيا حار بقى!" ده غير إن الدين في القلب، ومتحبكهاش بقى يا عام الشيخ و الكلام دة !، وحتلاقي بنات مش محجبات بس محتشمات، ودول نسبة مش بطالة، وحتلاقي بنات محجبات وملتزمات "ملتزمات بجد يعني، مش من فوق مأنتمة مع عمرو خالد، ومن تحت مأنتمة مع عمرو دياب" لأ، محجبات بجد، هما نسبتهم قليلة بس أنا شايف إن في السنين اللي فاتت اعدادهم في إزدياد.

نصيحة بقى لو ناوي تتجوز من البوسنة ركز مع المحجبات دول، لأسباب كتير إنت عارفها، أهمها إن المحجبة أو الملتزمة حتراعي ربنا فيك .... اه بالمناسبة، الستات البوسنويات بشكل عام معروفين انهم ستات بيوت من الدرجه الأول، يعني ماتقلقش من النقطة دي!

طاب حايجي واحد يسألني "ازاي وفين أتعرف على واحدة من البوسنة؟"، في الحالة دي مفيش قدامك غير حل من تلاتة

١- تدخل على جروبات وصفحات على الفيسبوك اللي بتتجمع فيهم البنات البوسنيات، وتبدأ تتكلم معاهم بهدف التعارف، ولو واحدة إستجابت ممكن تبدأ تتعرف عليها شيئاً فشيئاً ولو عجبتك وعجبتها تبدأوا تفكروا في إمكانية الإرتباط و ازاي تقدروا تتقابلوا، و غالباً لازم تبعتلك دعوة عشان تزورها في البوسنة و تشوفها على الطبيعة، و دة طبعاً أحسن حل عشان الحياه الإلكترونية دي ماتنفعش، لازم تشوفوا بعض. تفاصيل أكتر عنالسفر والإقامة في البوسنة حتلاقيها في الصفحة دي

٢- في طريقة تانية هيا التعارف عن طريق موقع قِران، ودة موقع بيتجمع فيه الشباب والشابات من العالم الإسلامي اللي عايزين يتجوزوا وعن طريق الموقع دة بيقدروا يتواصلوا مع بعض

٣- الطريقة التالتة ودي أنك تسافر البوسنة سياحة وتدور بنفسك على عروسة، ودي طبعاً طريقة أنا معرفش حد شخصياً جربها ونفعت زي الطريقتين التانيين، ولو حد جربها ونفعت ياريت يكتب تعليق

٢- خليك واضح وصريح من الأول
في حالة انك بدأت تتكلم مع واحدة من البوسنة وإرتاحتوا لبعض ياريت يعني تبقى صريح معاها "يعني ماتاكولش دماغها بقى انك في بلدك شاب أسطوري وعندك كام بير بترول، أو إن بلدك أحسن بلد في الدنيا و احسن من أستراليا والكلام دة بلاش منه" خليك على طبيعتك، خليك واضح وصريح جداً، خليها تتعرف عليك أكتر، إشرحلها ظروفك الشخصية والمادية وظروف بلدك، لإن الصراحة دي حترسم في دمغها الصورة الحقيقية للحياه اللي هي مقبلة عليها، و بناءاً عليه الحياه بعد كدة حتبقى أسهل.

٣- اتفقوا مع بعض على التفاصيل
لو حبيت ترتبط بفتاه بوسنية، كل تفاصيل الزواج حتتناقش معاها هيه بس فيها، يعني مفيش تدخل من الأهل إطلاقاً. بالنسبه للمهر فده شيء دخيل على المجتمع البوسنوي، الملتزمين منهم بس هما اللي بيطبقوه ولكن مش بالشكل اللي في العالم العربي، يعني بيبقى في الغالب مبلغ بسيط لا يتعدى الالفين يورو بالكتير، والشبكة برضه ملهاش شروط، لإن الأشياء دي بتبقى هدية منك لها. طبعاً دة مش معناه انها بتقبل بأي حاجة عشان مش لاقية عرسان مثلاً، بل لأنها عايزه ترتبط بيك وبتقبل باللي إنت تقدر عليه. طبعاً دي مش قاعدة عامه، الكلام دة بيختلف من واحدة للتانيه. أهم شيء إن يبقى في صراحة ووضوح وقبول وإتفاق مابينكم.

٤- إستعد في أي وقت أنك تعيش في البوسنة
زي ما قلت قبل كدة، لازم تشرح لها ظروف المعيشة معاك في بلدك حتبقى ازاي، عشان تعرف هيا مقبله على إيه! خلي بالك، دي واحدة حتسيب أهلها وناسها وتيجي تعيش معاك في بلد عمرها ما شافتها قبل كدة غير في التليفزيون، مقبلة على المعيشة في بلد ماتعرفش فيها حد غيرك، ماتعرفش تتكلم لغة البلد دي، مقبلة على مناخ مختلف تماماً "وخلي بالك من الجزئية دي لأن معظمهم بيكره الجو الحر جداً اللي في بلادنا وبيفتقدوا التلج اللي كانو عايشين فيه والجو الجميل في الصيف"، بس في حاجة هما بيحبوها في بلادنا، البحر :). فحاول انك توفرلها معيشة كريمة تليق بيك وبيها، وحول انك تخلي بالك منها أكتر من لو اتجوزت واحدة من بلدك لإن هيا ماتعرفش حد غيرك في بلدك، يعني حتحتاج إهتمام منك أكتر وحتحتاج انك تعرفها ازاي تتأقلم على المعيشة في بلدك، وياريت تخلي أهلك يساعدوك انهم يحببوها في بلدك، لإنها حتحتاج دة جداً.

في حالة انكم إتفقتوا على انكم تعيشوا في البوسنة "لإن معظمهم مابيقدرش يسيب أهله أو مابيقدرش يعيش في بلادنا"، فهي كبلد زي ماقلت قبل كدة جميلة جداً وجوها جميل والمعيشة في البوسنة رخيصة، بس حيبقى عندك مشكلة صغيرة، انك تلاقي شغل. تقريباً أعلى معدل للبطالة في أوروبا في البوسنة، فصعب جداً انك تلاقي شغل في البوسنة لأن لازم تتعلم لغتهم

طبعاً أسهل و أحسن طريقة لتعلم اللغة البوسنية هو موقع
SpeakBosnian.com
الموقع دة الوحيد اللي بيعلم اللغة البوسنية, الصربية و الكرواتية مجاناً, فية 100 درس كل درس في مادة صوتية و نص, يعني لو أتقنت نص الدروس دي و تكلمت اللغه البوسنيه مثل ما بتسمع في الموقع دة حتبقى بجد ممتاز في اللغة

أكيد طبعاً لو تقدر تفتح مشروع في البوسنة يبقى كويس، و لو عرفت تلاقي فرصة عمل في البوسنة بمرتب لا يقل عن 800 مارك بوسنوي "تقريباً 550 دولار" حتعرف تعيش كويس، بس لو ماتقدرش تفتح مشروع وصعب تلاقي شغل، يبقى نصيحة مني خليك في بلدك أحسن

معلومات أكتر عن شروط الإقامة في البوسنة

٥- المساوة بين الزوج والزوجة
حاجة لازم تعرفها من قبل الجواز من بوسنية، إن في إلى حد كبير مساواه مابين الراجل والست، ودة طبعاً عشان احتكاكهم بالغرب، يعني زي ما أنت بتشتغل هيا برضه لازم تشتغل، وزي ماهية بتاخد بالها من البيت إنت برضه لازم تشارك في شغل البيت! غريبة بالنسبة لنا، مش كدة! بالنسبالهم دة الطبيعي، زي ماهو طبيعي لو اتجوزت من أي واحدة من أميركا أو ألمانيا مثلاً! فحاول تأهل نفسك لدة.
بخصوص المساوة بين الراجل و الست في البوسنة، في اجراءات الجواز، الشهود ممكن يبقوا راجلين، أو راجل وست واحدة بس، مش زي عندنا رجل وامرأتان! حتعمل إيه بقى، ثقافتهم كدة

٦- محظورات
لو إنت متجوز في بلدك وعايز تتجوزها كزوجة تانية، بلاش تتقدملها أحسن، لأن دة بالنسبالهم ممنوع منعاً باتاً! وللأسف الشعب البوسنوي واخد فكرة عن العرب انهم بيتجوزوا أربعة وبيحبسوا ستاتهم في البيت وكدة، فحاول تغير إنت الفكرة دي.

زواج الأقارب عندهم في ثقافتهم يعتبر جريمة، ولو حتى أقارب من الدرجة العاشرة، فمتحاولش تدخل في نقاش معاها في حاجة زي دي. بلاش، إسمع مني!

لو إنت عايز تتجوزها عشان تعيش في بلدها بس، أو عشان تعيش في بلدها على أمل انك منها تتنقل لدولة تانية في أوروبا "جواز مصلحة يعني" فبلاش أحسن، لإن بنات الناس مش لعبة!

٧- إجراءات الزواج
في حالة انكم اتفقتم على الجواز، فإجراءات الزواج مش صعبة إطلاقاً

إما انك تاخذها وتروحوا سفارة بلدك في سراييفو وتتجوز هناك طبقاً لقانون بلدك، وبعد كدة تترجم قسيمه الزواج دي وتوثقها في البوسنة عشان الدولة البوسنية تعترف بالزواج دة. الخطوة دي احسنلك عشان بعد كدة لما تروح بلدك إنت وهيا تقدر هيا تاخد اقامه بسهولة

أو انك تتجوز حسب قانون بلدها وبعد كدة تترجم وثيقة الزواج عشان تتوثق في بلدك ومنها هيا تقدر تحصل على الإقامة في بلدك

في النهاية، لازم تعرف إن البنت البوسنية زيها زي أي بنت في الدنيا مع إختلاف العادات والتقاليد، يعني حتسعدك زي بنت بلدك ، وحتنكد عليك زي أي مخلوقة تانية خلقها ربنا "دي أشياء بديهية يعني لو ناوي تتجوز أي واحدة لازم تعمل حسابك إن في شوية نكد كدة"، ومن الناحية الأخرى لازم إنت تراعيها وتتعامل معاها يمكن أحسن ما حتتعامل مع واحدة من بلدك وتقبل الإختلاف في العادات
والتقاليد، وتوفر لها حياه كريمه

لو حابب تتعرف على خطوط الطيران اللي بتسافر من بلدك الى البوسنه, افتح المقال دا
و لو حابب تحجز فندق أو شقه في سراييفو, مافيش احسن من بوكينج في الحجوزات

اللي عايز يشارك بتعليق أو عنده أي اسئلة ياريت يكتب تعليق على المقال دة، وياريت ماتنسوناش من الشير والريتويت

ELBOSNA.COM - الزواج من بوسنية

النصائح السبعة القوية في الزواج من بوسنية

أضف تعليقك

ELBOSNA.COM - الزواج من بوسنية

النصائح السبعة القوية في الزواج من بوسنية

أضف تعليقك

إنضم إلى قائمتنا البريدية و إقرأ المزيد عن البوسنة مجاناً